Og soleiðis fer bólturin aftur og fram millum Mentamálaráðið og Samferðslumálaráðið. Aðalstjórin í Mentamálaráðnum, Poul Geert Hansen, sigur, at Mentamálaráðið visti onki um tær avtalurnar, sum viðførdu rokningarnar. Fráfarna landsstýriskvinnan var uppaftur meira bersøgin og legði Landsverk undir at dylja upplýsingar fyri sær.

Vit hava sostatt tvey aðalráð, sum so ella so vara av Glasi, men hvørki veit nakað um tey arbeiðini, sum Landsverk hevur avtalað og Mentamálaráðið nú fær rokningar fyri. Kanning varð sett í verk av Landsverki, men sjálvt ikki tá komu hesar rokningarnar uppá 30,9 milliónir fram í ljósið. Og hvat verri er: Har er ongin í skipanini, sum veit, um hesar rokningarnar verða tær seinastu. Avtalurnar eru munnligar, og av onkrari orsøk kann sjálvt Landsverk heldur ikki fortelja, hvørjar tær eru og hvat tær kosta.

Jóannes Ejdesgaard, fyrrverandi løgmaður segði í kjakinum ígjárkvøldið at embætisverkið rundan um bæði landsstýrisfólkini í mentamálum og samferðslumálum høvdu svikið sína uppgávu. Mynd: kvf.fo

Vit hoyra so nógv um, at lurtast má eftir serfrøðini og sakkunnleikanum. Og ongantíð áður hevur miðfyristingin havt so mong væl útbúgvin fólk at heita á og dúva uppá. Men kortini finst ongin í herinum av væl útbúnum embætisfólkum í miðfyrisitingini ella serfrøðingunum  á Landsverki, sum er førur fyri at geva eitt yvirlit yvir, hvørji arbeiðir eru goldin og hvørji eru eftir at gjalda á einum føroyskum miðnámsskúla.

Kanska tað ikki er so løgið, at Palleba er skeptiskur við at lurta eftir akademisku elituni.