Nýtt KÍ lið stóð seg væl í fyrstu royndini
Í einum jøvnum dysti, har HB hevði størsta møguleikan, meðan KÍ kanska hevði fleiri málroyndir, so var javnleikur helst eitt rættvíst úrslit.
KÍ spældi ein góðan fyrra hálvleik. HB hevði bóltin meir, men KÍ var nógv vandamiklara liðið. Jonn Johannessen og Jóannes Bjartalíð høvdu góðar royndir. Í síðsta stóra møguleikanum í fyrra hálvleiki var KÍ leikari nær við at gera sjálvmál, men vælleikandi Meinhardt P. Joensen bjargaði.
Í seinna hálvleiki kom HB betri við og hevði yvirvág í bæði spæli og málmøguleikum fyrsta partin av hálvleikinum. Dan í Soylu fekk størsta málmøguleikan í dystinum, men hann skeyt beint á Meinhardt P. Joensen. KÍ kom betri við um miðjan seinna hálvleik og tvær ferðir var nær við. 0-0 var úrslitið og tað tóktist, sum bæði liðini vóru væl nøgd við tað úrslitið. HB fekk stig í einum truplum útidysti, meðan KÍ við fimm leikarum antin í uppstillingini fyri fyrstu ferð ella á nýggjum plássi, fekk stig í síni fyrstu roynd við hesum liðnum.