Norðoyingarnir í samgonguni formenn
Tá samgongan minkaði við Kristini Michelsen fyrst í ár, setti tað ein kavabólt á rull, ið viðførdi nógvar umskipanir. Millum annað eru nú tvey landsstýrisfólk í mentamálum, og tingnevndirnar eru eisini lutvíst umskipaðar. Her eru tey bæði norðoyatingfólkini hjá samgonguni telvað í formanssessir.
Beinleiðis ávirkanin var, at Bárður á Steig Nielsen nú er formaður í Fíggjarnevndini. Hetta er úrslit av, at Kristin Michelsen er limur har og tí broyttist javnvágin til frama fyri andstøðuna.
Óbeinleiðis ávirkanirnar vóru, at Óluva Klettskarð nú er forkvinna í Mentanarnevndini, har núverandi mentamálaráðharrin, Hanna Jensen, sat. Og so at Jónleif Johannesen er valdur til formann í Trivnaðarnevndini.
Við hesum eru norðoyingarnir í samgonguni koyrdir fram í Løgtinginum, og spurningurin er um tað er fyri at geva teimum ein pall til løgtingsvalið. Spennandi verður at vita, hvussu nógv tey megna at avrika, nú so stutt tíð er eftir av valskeiðinum. Men tað sleppa tey nú at vísa í verki.
Hepna hond!