Stórur spenningur er í Sambandsflokkinum. Stóri atkvøðuslúkurin hjá Norðoya Sambandsfelag Bjørn Kalsø stillar ikki upp til fólkatingsvalið hesaferð, og spenningurin er um, hvørja undirtøku nýggja valevnið hjá flokkinum í Norðoyggjum, Sunneva Simonsen Ludvig úr Hvannasundi, fer at fáa.

Eisini er spennandi, hvussu valevnini hjá Fólkaflokkinum fara at klára seg innanhýsis. Leingi hevur ljóðað, at Jákup Mikkelsen ikki fór at stilla uppaftur, men hann stendur á atkvøðuseðlanum. Saman við honum stilla eisini Elsebeth Mercedes Gunnleygsdóttir og Beinir Johannesen upp. Beinir Johannesen fekk eitt heilt gott úrslit á seinasta kommunuvali, og í Fólkaflokkinum er mesti spenningurin um, hvussu Elsebeth, Beinir og Jákup fara at standa seg, ikki minst í mun til hvønn annan.

Tjóðveldi hevur verið í andróðri í Norðoyggjum vegna sín fiskivinnupolitikk, og ein teirra, sum hevur fingið nógvar ákoyringar fyri tað, er Óluva Klettskarð úr Klaksvík. Seinasta kommunuval misti hon sessin í býráðnum í Klaksvík, og flokkurin fór úr 3 niður í 1 umboð. Tað eina vinnandi umboðið, Steinbjørn O. Jacobsen, var ivaleysur í, hvør orsøkin var: “Tað er fiskivinnunýskipanin!” Her er tí eisini spenningur um undirtøkuna hjá Tjóðveldi og Óluvu Klettskarð, sum er einasta valevnið hjá flokkinum í Norðoyggjum hesa ferð.

Tað mest markanta valevnið hesaferð hevur uttan iva verið Jógvan Skorheim. Hansara politikkur at lata stólin standa tóman hevur vakt ans, og flokkurin hevur fingið framgongd í veljarakanningunum eftir hesa útmeldingina. Tað er væl neyvan nakar, sum roknar við, at Sjálvstýri vinnur sessin, men tað er kortini spennandi, um hendan avgjørda loysingarkósin fer at geva fleiri atkvøður. Spurningurin her er eisini, um vit fara at síggja eina borgarstjóraeffekt her.

Javnaðarflokkurin er tann, sum uppstillar flestar norðoyingar. Umframt landstýriskvinnuna Eyðgunn Samuelsen stilla eisini tingmaðurin Jónleif Johannesen upp, eins og Finnbjørn Vang og Gunnvá Tróndardóttir Joensen. Hartil verður løgmaður, Aksel V. Johannesen, eisini av fleiri framvegis roknaður sum norðoyingur, hóast hann ikki longur býr í økinum. Verður hann taldur við, eru 5 av 15 valevnum á Lista C úr Norðoyggjum.

Miðflokkurin stillar ikki upp til Fólkatingið, og tað er tí áhugavert, hvat tað fer at merkja. Allir veljararnir sita neyvan heima av hesi orsøk, og hvar teirra atkvøður so fara, veit ongin. Eftir hvørjum flokkurin hevur atkvøtt saman við síðstu 4 árini ber at gita til Sambandsflokkin og Fólkaflokkin, men hetta er als ikki vist.

Ikki minst er fólkatingsvalið spennandi, tí tað fer at geva greiðar ábendingar um komandi løgtingsval. Í 2015 vunnu teir flokkar, sum vunnu fólkatingsvalið, eisini løgtingsvalið, ivaleyst tí so stutt var ímillum. Tað er líka stutt ímillum hesaferð, og tí fara neyvan nógvar atkvøður at flytast millum flokkar – sjálvsagt burtursæð frá atkvøðunum hjá Miðflokkinum og Framtakinum.

Sum ein navnframur norðoyingur segði – Her er háspenningur í luftini!

Norðlýsið hevur koyrt ræst í pottin og ynskir øllum eitt gott valkvøld!