KÍ boðar í dag frá, at felagið hevur gjørt sáttmála fyri restina av árinum við 32 ára gamla Semir Hadzibulic. Tey sum hava fylgt við føroyskum fótbólti seinastu árini kenna Semir, tí árini 2016-2018 var hann ein lyklaleikari á KÍ-liðnum og millum teir bestu leikararnar í kappingini. Hann er sambært FaroeSoccer skrásettur fyri 70 dystir í bestu deildini. Hann hevur skorað 9 mál og sambært okkara upplýsingum lagt upp til 9 mál. Semir kann røkja øll pláss á miðvøllinum. Semir gavst í KÍ eftir kappingarárið í fjør og hevur síðani á spælt við Gjilani í bestu deildini í Kosovo.

Flytingarvindeygað letur upp leygardagin 15. juni og eftir ætlan kemur Semir til Føroyar sunnudagin. Hann verður sostatt tøkur til dystin móti TB á jóansøku eins og til Europa League dystirnar móti Tre Fiori 27. juni og 4. juli. Undanfarin ár hevur júst Semir spælt stóran leiklut til júst Europa League dystirnar.