Tað er Karl Heri Joensen, sum stendur fyri arbeiðinum at gera økið byggibúgvið við parkeringsøki ovast, steinsettum gøtum, lágum ljóssteyrum, bonk-øki, blomsturbed sett við bøllugróti og so økið har sjálv standmyndin, sum Hans Pauli Olsen, myndhøggari ger, skal standa.

Ovast í økinum verður gróðursett. Alt hetta byrjar nú at taka skap og sær rættiliga gott út. Gunnleiv Joensen ger graviarbeiðið og TTS ger el-arbeiðið. So alt í alt verður hetta ein vøkur lítil gróðursett lund við Elinborg Lützen, listakvinnu lítandi norðuryvir – á góðum gomlum gøtum.

Mentanarnevndin hjá Klaksvíkar býráð setti í 2017 ein verkætlanarbólk, at arbeiða við at reisa standmyndina – eitt minni, um Elinborg Lützen, myndlistakvinnu, ið hevði fylt 100 ár 26. juli 2019 – Hetta eftir uppskoti frá Edward Fuglø, umvegis Norðoya Listafelag.

Henda standmynd verður fyrsta av sínum slag, reist navngivnari kvinnu í Føroyum.

Økið kring minnisvarðan verður sum sagt skipað sum ein gróðursett lund, og tekur Karl Heri Joensen sær av hesum arbeiði vegna Klaksvíkar kommunu.

Lundin skal eftir ætlan standa liðug, tá ið standmyndin verður reist – 26. september 2019.