Bjørn Kalsø stillaði fyri fyrstu ferð upp í 2004 fyri Sambandsflokkin, og gjørdist hann stutt eftir landsstýrismaður í fiskivinnumálum. Síðan hevur hann verið valdur í Løgtingið á valinum í 2008, 2011 og aftur í 2015. Frá 2011 – 2015 var hann landsstýrismaður í skúla- og mentamálum.

Bjørn Kalsø sigur, at hann hevur tikið avgerð um ikki at stilla upp hesaferð, eftir at hava verið virkin í kommunu- og landspolitikki í á leið 22 ár tilsamans.

Nú Bjørn Kalsø ikki stillar upp hesaferð, takkar hann fyri allan stuðul og samstarv á leiðini, og ynskir teimum, sum nú bjóða seg fram at stýra landinum bestu eydnu.

Norðoya Sambandsfelag, sum fekk nýggja nevnd á seinasta aðalfundinum hevur lýst til annan uppstillingarfund á Rygsvegi 3 í Klaksvík í kvøld kl 20 har formaðurin í Sambandsflokkinum, Bárður á Steig fer at greiða frá politisku  støðuni og hvørjar ætlanir Sambandsflokkurin hevur.