KÍ var á hagtalssíðuni betra liðið á Svangaskarði, men eitt mál í 34. minutti hjá Idriz Voca eftir gott uppspæl frá Blessing Eleke gjørdi, at uppgerðin ongantíð bleiv spennandi eftir tað, um vit hugsa um, hvør skuldi koma víðari.

KÍ spældi samanlagt ein góðan dyst og sambært hagtølunum, so var KÍ omaná. KÍ hevði bóltin meira (54 % - 46 %), fleiri málroyndir (17-8), fleiri málroyndir innanfyri málstengurnar (6-3) og fleiri hornaspørk (3-2). Men einasta málið fekk Luzern og júst Eleke, ið legði upp til málið, var nærum einasti leikarin, sum KÍ hevði trupulleikar av í verjupartinum. Størsta málmøguleikan hjá KÍ fekk Deni Pavlovic, sum skallaði hornasparksinnlegg frá Jóannes Bjartalíð á tvørstongina í seinna hálvleiki.

Nú stendur landskappingin fyri framman hjá KÍ, og Europa League dystirnir hava givið KÍ fleiri kort at spæla. M.a. hava Páll A. Klettskarð og Semir Hadzibulic fingið nakrar dystir í beinini og tykjast betri fyri, enn tá teir komu í hópin fyrr í summar. KÍ fekk eitt søguligt summar, tí ongantíð áður er KÍ komið víðari tvær ferðir sama kappingarár. Í kvøld takkaði KÍ fyri seg í Europa League í ár við góðum avriki, ið tó ikki rakk til nakað stig.