Sýnist sum tjóðveldi, javnfl og framsøkn vilja  venda ognarrættinum til lønina á høvdið. Landskassin skal fyrst hava sítt og síðani kann løntakarin náðiligast fáa sín part av síni egnu løn.Umboð fyri Framsøkn segði í kjaki, at vit kundu ikki geva skattalætta, tí tíðirnar vóru ov góðar til tað. 

At ráða yvir egnari løn – bæði í góðum og ringum tíðum   hevur nakað við ognarrætt og persónligt frælsi at gera. Ogn er ogn,  óansæð um tíðirnar eru ringar ella góðar. Tað almenna skal halda aftur við virksemi  í góðum tíðum, men skal ikki taka ræðið á skattaborgarans peningi. Tað er skattaborgarans ogn. 

Vit eru tó øll noydd at gjalda okkara part  til vælferðarsamfelagið, og tað er neyðugt. Tað er tí sera umráðandi, at skattaborgarans peningur verður skynsamt umsitin við stórari ábyrgdarkenslu. Vit skulu syrgja fyri, at  skattgjaldarin fær sum mest fyri skattakrónurnar, sum hann letur í felagskassan. Mín persónligi dreymur er, at ongin skal rinda meir enn 30 % í skatti og avgjøldum av lønini.  Eg havi tað álit á fólki, at tey vita best, hvat teirra peningur skal brúkast til og ikki ómynduggera fólk. Fólkaflokkurin er besta trygdin fyri, at skattaborgarans peningur verður rætt og bíligast umsitin og við tí lægst møguligum skatti til okkum øll. 

Nátúrligi Inntøkuvøksturin síðstu 4 árini hevur verið uml. 1 milliard umframt eykaskatt og eykagjøld, sum samgongan hevur lagt á vinnuna og borgarin. Men hevur løntakarin merkt nakað til tað ?  Er hendan milliardin komin út í hvønn krók og inn í hvørja stovu ? Svarið er eitt greitt nei. Nógv tann størsti parturin av hesi milliardini er farin aðrastaðni millum skinns og hold. Bara  Glasir kostaði 400 milliónir meir enn ætlað. H-bygningurin kostar útvið 100 milliónir meir enn ætlað. Hetta eru bert tvey fesk dømir, sum standa klárast í minninum. Hesum skulu vit burtur frá. 

Vit náddu ikki á mál í undanfarnu borgarligu  samgongu, men fáa vit veljarans álit , so taka vit arbeiðið uppaftur, har vit sleptu, og fáa fólkið  aftur í fokus.

Elsebeth Mercedis Gunnleygsdóttur

løgtingslimur og valevni fólkafloksins.