Talan er um dyst millum nr. 3 og 4, har mong meta, at taparin er úti av FM-stríðnum. KÍ er á heimavølli og frammanfyri á stigatalvuni, men HB hevur havt sera gott tak á KÍ síðstu seks innanhýsis dystirnar.

Tá KÍ spældi seinasta sunnudag var liðið nógv skert, men hesaferð vera fleiri leikarar tøkir aftur. Patrik Johannesen og Boris Dosljak er við aftur eftir leikbann. Síðani er møguleiki fyri, at fleiri leikarar vera tøkir aftur, sum vóru skaddir seinast. Simen Sandmæl, Semir Hadzibulic og Torbjørn Grytten hava allir vant í vikuni og møguleiki er fyri, at teir allir vera í hópinum hesaferð. Hjá HB eru nærum allir leikarar tøkir. Símun Samuelsen hevur verið uttanfyri við skaða seinastu dystirnar, men hann var á bonkinum seinast.

Dysturin í Klaksvík byrjar kl. 15.00 og dómari verður Alex Troleis.