Eina venjingin í dag kundi bent á eina møguliga uppstilling. Sambært henni, so vera tríggjar broytingar í mun til dystin móti Svøríki. Inn koma Heini Vatnsdal, Jóannes Bjartalíð og Klæmint A. Olsen ístaðin fyri Hørð Askham, Árna Frederiksberg og René S. Joensen.

- Eg veit einki enn, men fái eg møguleikan, so eri eg klárur. Tað er langt ímillum, at tað koma summarfuglar, men kanska teir koma, um man skal ganga út á vøllin fyrstu ferð fyri landsliðið í dysti móti Spania, um eg fái møguleikan, segði ein róligur Jóannes Bjartalíð við Norðlýsið beint eftir dagsins venjing, ið var tann seinasta áðrenn dystin.

Jóannes Bjartalíð kom inn móti Svøríki hóskvøldið og var millum teir mest sannførandi leikararnar. Hann bleiv valdur til dagsins leikara hjá Sona.

Uppstillingin verður útfrá dagsins venjing hendan: Gunnar Nielsen - Sølvi Vatnhamar, Heini Vatnsdal, Atli Gregersen, Rógvi Baldvinsson, Viljormur Davidsen - Jóannes Bjartalíð, Hallur Hansson, Brandur H. Olsen, Jóan Símun Edmundsson - Klæmint A. Olsen.