- Tá ið vøllurin varð tikin av í summar, fóru vit beinanvegin í samskifti við IRF um hvussu vit skuldu burturbeina gamla graslíkið, og ikki minst svarta gummiundirlagið, sum liggur undir vøllinum. Gummiundirlagið bleiv burturbeint beinanvegin í góðum samstarvi við IRF, sigur Jógvan Skorheim, borgarstjóri í Klaksvíkar kommunu.

Partar av gamla graslíkinum fóru í summar til smærri vallir á ymiskum støðum uttan fyri kommununa, og nakað skal eitt nú brúkast til spæliplássið á Mylnutúni og á FIFA-vøllinum úti í Oyri og møguliga onkra aðrastaðni eisini.

- Eg gleðist um, at vit kunnu endurnýta stórar partar av vøllinum, men samstundis harmar tað meg, at seinasti parturin enn ikki er burturbeindur, men vónandi fáa vit nærri at vita frá IRF ein av fyrstu døgunum, so hetta málið kann avgreiðast skjótt, greiðir Jógvan Skorheim frá.

Hann leggur afturat, at tað kendist undarligt at lesa, at Norðlýsið hevði vent sær til kommununa.

- Eg eri ikki blivin uppringdur viðvíkjandi graslíkinum og vildi fegin svarað beinanvegin, men tann møguleikan havi eg so ikki fingið, staðfestir Jógvan Skorheim.