Venjarafelag Føroya skrivar soleiðis:

Fótbóltsárið hjá kvinnunum var eitt sindur spennandi áðrenn kappingina. Í tvey ár hevði EB-Streymur/Skála sitið á trónini, men stórar broytingar hjá júst EB-Streymi/Skála høvdu við sær, at KÍ, HB og ÍF/Víkingur/B68 tevjaðu møguleikan. Leingi lá ÍF/Víkingur/B68 væl fyri, men tá KÍ vann avgerandi dystin millum liðini 3-0 tann 7. august, tá tóktist meistaraheitið meira ella minni avgjørt.

Maðurin, sum stóð á odda fyri besta kvinnuliðnum, hevur vunnið meistaraheitið heilar níggju ferðir: 2007, 2008, 2009, 2010, 2011, 2012, 2013, 2014 og aftur nú í 2019. Hetta er samstundis aðru ferð, at Aleksandar Djordjevic er farin við heiðurinum hjá Føroya Venjara Felag.

Djordjevic skifti í 2015 til felagsliðið AB/B36, og vendi í 2018 aftur til KÍ. Hansara unga lið hevur nú ment seg til at leggja seg ovast aftur og venjarin hevur eisini undirskrivað sáttmála fyri komandi ár.

Vit ynskja Aleksandar Djordjevic hjartaliga tillukku!

Ársins venjari hjá kvinnum:

2011: Erik E. Nielsen (KÍ)
2012: Allan Dybczak(HB)
2013: Poul Grunnveit Olsen (EB-Streymur/Skála)
2014: Alexandar Djordjevic (KÍ)
2015: Poul Grunnveit Olsen (EB-Streymur/Skála)
2016: Alexander Jovovic (KÍ)
2017: Erik Nielsen (EB-Streymur/Skála)
2018: Mathias Davidsen (EB-Streymur/Skála)
2019: Alexandar Djordjevic (KÍ)