Talan er um eitt tól til urologiskar kanningar og skurðviðgerðir. Við øðrum orðum, er tólið ætlað sjúklingum, ið hava illgrunað um sjúku í landrásini.

Í einum tøttum samstarvi við Jóhan Poulsen, sergreinaábyrgdarhavandi yvirlækna og visitator fyri urologi í Føroyum, hava starvsfólkini á skurðdeildini fingið nágreiniliga frálæru og vitan um fyrimunir og dygdir tólið veitir sjúklingum, ið skulu kannast hvar illgrunið er um krabbamein í landsrásini.

Tólið gevur møguleikar hjá læknunum beinleiðis at síggja kyknubroytingar í eitt nú bløðruni hjá sjúklingum við skanningini. Hetta gerst við, at bløðran verður upplýst við NBI (optisk filter teknologi), ið hevur við sær, at tólið sær eitt nú kyknubroytingar, sum ikki kunnu síggjast við vanligum ljósi.

Tá Norðlýsið vitjaði á Klaksvíkar Sjúkrahúsi í dag, komu vit beint í frálæruna, ið starvsfólkini á skurðdeildini fingu um nýggja tólið.

Jóhan Poulsen arbeiðir regluliga á Klaksvíkar sjúkrahúsi og tekur sær av øllum skurðviðgerðum innan økið. “Hann hevur havt sína dagligu gongd á sjúkrahúsinum síðan 1972 og vit síggja fram til mong ár aftrat,” siga tey á Klaksvíkar Sjúkarahúsi.