John Heinesen, stjóri á Bil og Dekkverkstaðnum sigur, at nú tað eru liðin 20 ár síðani at feðgarnir báðir, John og Byrger byrjaðu í Klingrugarði vilja teir saman við familjuni bjóða øllum hjartaliga vælkomnan inn á gólvið í Klingrugarði til kaffi og at síggja framkomna bilverkstaði.

Vit gera alt innan umvælingar av bilum, bæði tá talan er um tekniskar feilir, plátuarbeiði og ikki minst hava vit eina sera framkomna sproytukabinu.

Sjálvur lærdi eg hjá Shell á sinni fyri mongum árum síðani, við Líggjasi í Gøtu sum lærumeistara, men nógv vatn er runnið í ánni síðani tá.

Eg og pápi byrjaðu við Essostøðini við Nólsoyar Pálls Gøtu, sum vit seldu tíðliga í 90-unum og 23. oktober í 1999 byrjaðu vit so her í Klingrugarði í tá nýggja framkomna verkstaðnum.

Hetta hevur verið ein spennandi tíð, eg haldi at eg kann siga, at tað hevur gingið væl hjá okkum. Hóast skiftandi tíðir, so hava vit alla tíðina havt nóg mikið av arbeiði.

Vit hava eisini sæð tað neyðuga í at fylgja við tíðini og at uppdaterað okkum til tað, sum umvælingar og annað arbeiðið við bilum hevur kravt.

Seinasta skotið á stammuni í so máta, er sproytukabinan, sum vit settu upp her fyri einum ári síðani. Tað var eitt ódnartak, tí ein slík kabina, sum líkur øll nútíðar krøv er sera kostnaðarmikil. Men vit eru glaðir fyri íløguna, tí hon hevur rigga avbera væl.

Eisini eru vit teldutøknuliga væl útgjørdir til nærum øll bilmerkir.

Eg haldi at eg kann siga, nú vit í morgin fara at hátíðarhalda 20 ára dagin síðani vit byrjaðu í Klingrugarði, at vit hava ein bilverkstað, sum líkur øll krøv bæði frá tí almenna og frá viðskiftafólkum okkara.

Tit eru øll vælkomin inn á gólvið í dag 23. oktober, sigur John Heinesen at enda.