Dystarveðrið í morgin
Nú er bert eitt samdøgur eftir – gott og væl – til dystin í morgin. Hvussu verður at standa ella sita og hyggja at fótbólti í Gundadali?
Alt snýr seg um hvønn vegin eitt lágtrýst fer tvørtur um Føroyar eystureftir. Bert ein lítil broyting, so broytist veðrið nógv.
Í gjár varð spátt her á portalinum hjá Norðlýsinum, at áskoðararnir í Gundadal kundu vænta sær 7 til 12 m/s av norði ella eysturhallum norði – saman við ælaveðri (regni ella møguliga vátakava).
Í dag spáa vit, at vindurin verður eitt sindur meiri – 10 til 15 m/s av norði ella eysturhallum norði – saman við regni – onkur løta turr. Hitin fer at liggja um 5-6 stig.
Sambært sera, sera, sera vælvitandi keldum í Havn, so er norðan ella eysturhallur norðan allarbesta ættin í Gundadali. Vindurin fer tó at merkjast eitt sindur, men tað verður meiri enn so spælandi, sigur keldurnar, ið vilja vera ónevndar (teir halda við B36!). Tað truplasta at siga frá veðrinum í morgin er avfallið – hvussu nógv regn ella ikki.
Men vit fáa at síggja.
Næsta dagføring verður um middagsleitið í morgin.