Ein Krimi og eitt Søgunám
- Upprunaliga var tað ikki ætlanin, at bøkurnar skuldi koma út at kalla um somu tíð, sigur Steintór Rasmussen, rithøvundurin, sum hesar dagarnar er aktuellur við ikki færri enn tveimum bókaverkum; EIN ER TÍÐIN AT LIVA, sum er fimta og seinasta bind í krimirøðini Deyðin fer í bindiklubb; og SØGUNÁMIÐ, ið er eitt savn við 16 stuttsøgum fyri børn og vaksin.
- Tíbetur eru tað framvegis nógv føroysk børn, sum tíma væl at lesa. Vakrar, kenslubornar og spennandi søgur. Og ikki øll vaksin orka í holt longri skaldsøgur og bókaverk. Tí havi eg afturat krimibókunum arbeitt við søgunáminum, sum eg vóni vil fanga tann yngri og meiri ótolna lesaran, ið dámar væl at kryddað lesiupplivingina við spennandi og hugvekjandi, ja, enntá eisini nøkrum eitt sindur óhugnaligum tekingum.
Tað er Allar Korsagar Davidsen, sum hevur myndprýtt Søgunámið, sum er 132 síðir og inniheldur útvið 100 tekiningar. Jan Nystrøm hevur gjørt kápumyndina til Ein er tíðin at liva, sum er tilsamans 360 blaðsíðir.