Í gjár kundi Kringvarpið bera tíðindini at fútabann varð sett fyri tíðindunum, tá Kringvarpið ætlaði at greiða fólki frá einum fundi millum føroyskar og kinesiskar myndugleikar.

Fyri løtu síðan sendi Føroya Landsstýri út tíðindaskriv har grundgevingar vórðu fyri hví fútabannið varð sett. 

Orsøkin til, at landsstýrið heitti á fútarættin um at leggja fútabann, er, at Kringvarp Føroya hevði ætlanir um at brúka eina upptøku, ið stovnurin av órøttum hevði fingið hendur á, stendur m.a. at lesa í tíðindaskrivinum.

Vit hava fingið uppspurt frá fleiri keldum hvussu Kringvarpið hevur fingið fatur á upptøkunum. Málið snýr seg um at Kringvarpið er í Vinnumálaráðnum og skal gera upptøku við Helga Abrahamsen, landsstýrismann um annað mál. Ímeðan riggað verður til kemur eitt høgtstandandi fyrisitingarfólk í Vinnumálaráðnum og biðjur Helga um at koma í einarúm, hann skal kunnast um samráðingar millum føroyskar og kinesiskar myndugleikar. 

Tað vil so við, at mikrofonin á Helga Abrahamsen er tendrað, ímeðan hann fær kunningina frá fyrisitingarfólkinum.

Tað eru hesar upptøkur, ið kringvarpið ynskti at brúka og sum Føroya Landsstýri síðani hevur fingið fútan at seta bann fyri. 

Í løtuni viðger Føroya Rættur málið. 

Brot úr leiðreglunum fyri góðan fjølmiðlasið:

2.3 Fjølmiðlafólk eiga ikki at misnýta sína støðu til egnan fyrimun.

3.3 Tað er góður fjølmiðlasiður at halda avráddar fortreytir fyri samrøðum og øðrum tíðindum.

3.4 Fjølmiðlarnir eiga at verja heimildirnar. Hetta er ein fyritreyt fyri, at fjølmiðlarnir kunnu inna teirra samfelagsábyrgd og tryggja atgongdina at týðandi upplýsingum.

3.6 Tilfar, ið ikki er almannakunngjørt, eigur sum meginregla ikki at latast óviðkomandi.

3.8 ….ókunnleiki ella vantandi metingarevni skulu ikki misnýtast.

3.9 Tað er ikki góður fjølmiðlasiður at nýta fjalt upptøkutól ella mikrofon, ósannan samleika o.tíl. uttan í heilt serligum førum, tá ið eingir aðrir møguleikar eru at avdúka viðurskifti, ið hava stóran samfelagsligan týdning.