(Úr Norðlýsinum mikudagin) Liðið fekk bara seks stig í 27 dystum og endaði aftast. Men liðið flytur ikki niður, tí eingin megnaði at spæla seg til uppflyting í næstbestu deildini. Men ÍF ætlar ikki, at søgan skal endurtaka seg.

ÍF hevur longu fingið tveir profilar í hópin. Milos Budakovic, ið hevur verið málverji í TB í nøkur ár, kann væntast at styrkja nógv um málmansøkið, meðan Filip Djordjevic eftir eina tíð við meistaraheitum og løgmanssteypum í Víkingi nú skal vísa, hvat hann megnar hjá einum botn 5 liði. Í 2019 sat hann á bonkinum ein part av kappingini, so talan er helst um ein svangan leikara. ÍF hevur mist Dávid Langgaard, sum vegna sín bústað í høvuðsstaðnum hevur gjørt sáttmála við AB. Tað ljóðaði, at ÍF var eitt av liðunum, sum royndi eftir Lukasz Cieslewicz. Og tað ljóðar eisini, at vit kunnu væntar fleiri leikarar til ÍF afturat. Ein leikari sum er uppá tal er Bogi Reinert-Petersen, sum eftir summarsteðgin spældi við Víkingi, men sum annars fyri tað mesta hevur spælt við ÍF. Hann hevur ongan sáttmála fyri 2020. Líkt er undir øllum umstøðum til, at ÍF verður í einari munandi sterkari útgávu í 2020 á manningarsíðuni, um søgurnar passa, at vit kanska koma at síggja minst fimm nýggjar leikarar í hópinum.

Tilgongd:

Milos Budakovic

Filip Djordjevic

Frágongd

Dávid Langgaard

Petur Meinhard Magnussen