Nógvur vindur alla vikuna
Tað er skjótt at skriva um veðrið í morgin. Vindur. Nógvur vindur. Eisini í ovurmorgin, týsdagin. Nógvur vindur.
Tað sum ger alt hetta veðrið, eru nøkur óvanliga djúp lágtrýst, sum ferðast ímillum Ísland og Grønland. Eitt av teimum verður væntandi heilt niðri á 930hPa týsdagin.
So lítið trýst er okkum vitandi ikki mált í Føroyum, og so lágt verður heldur ikki mált hesaferð, tí miðjan er so langt burtur. Barometrini í Føroyum fara at vísa eini 970hPa ta løtuna.
Vindurin er farin at veksa eitt sindur í dag. Í løtuni (klokkan er 16) er 10 til 15 m/s úr útsynningi. Á midnátt er vindurin komin upp í 13 til 18 m/s, og ættin farin niður í sunnan. Tá er eisini farið at regna.
Í nátt, meðan tað framvegis regnar meiri ella minni, fer vindurin at veksa enn meir. Tá ið fólk fara til arbeiðis í morgin ári, er vindferðin komin upp í 18 til 23 m/s úr suðuri. Soleiðis er tað allan fyrrapartin í morgin.
Eitt sindur út á seinnapartin fer ættin vestur um sunnan og ímóti útsynningi, og tað slítur í. Eina løtu veksur vindurin upp í 20 til 25 m/s, men út á kvøldið fer vindurin at minka. Á midnátt í annaðkvøld er vindferðin væntandi 12 til 17 m/s.
Hitin í morgin fer at liggja um 7 til 9 stig.
So er tað veðrið týsdagin.
Týsnáttin er ikki so nógvur vindur. 10 til 15 m/s úr suðuri, sum út á morgunin veksur til 13 til 18 m/s. Regn meginpartin av týsnáttini og týsmorgunin. Á middegi er vindferðin um 18 til 23 m/s saman við nógvum regni.
Seinnapartin týsdagin fer ættin vestur um sunnan til útsynning. Eitt sindur minni vindur eina løtu, men so eru aftur 18 til 23 m/s. Tað fer at slíta í út á seinnapartin; um kvøldið turt.
Sum viðurskiftini í lufthavinum í løtuni, so er aftur nógvur vindur mikudagin, ikki so nógvur vindur hósdagin, veksandi aftur út á seinnapartin fríggjadagin, og heilt fitt næstan alt næsta vikuskiftið.