Í eina tíð hevur ein flokkur frá Innovatións- & Íverksetanarlesandi á Bachelor-støði á Glasi arbeitt við eini verkætlanarferð til Japan. Tey lesandi eru í Japan hesa vikuna, og tann 16. januar var fundur í Tokyo við borgarstjóran í Taiji.

Saman við borgarstjóranum í Klaksvík, Jógvani Skorheim, og Sigmundi Isfeld, sendimanni í Kina, varð avtala fingin í lag um henda fund, soleiðis at tey lesandi vórðu boðin til fundar og døgurða hjá Kazutaka Sangen, borgarstjóra í Taiji.

Á fundinum vórðu viðurskiftini millum býirnar umrøddir, og borgarstjórin greiddi  frá um eina ferð í Føroyum. Hann var sera bergtikin av, hvussu vakurt tað var í Klaksvík, og hvussu væl hann varð móttikin. Tí var hann eisini ómetaliga glaður fyri at kunnu bjóða lesandi frá Føroyum á fund og vísa teimum blíðskap.

Borgarstjórin tosaði eisini um vitjanina á Føroya Bjór, har Annika Waag, stjóri, vísti og greiddi frá virkseminum. Borgarstjórin var tí sera glaður fyri gávuna, sum tey lesandi høvdu við frá Jógvani Skorheim, sum var alt gott frá Føroya Bjór og ikki minst turrur fiskur úr Klaksvík.

Finn Jensen, Dekanur á Glasi, metir, at hesin flokkurin hevur fingið eitt serligt samband við Klaksvík. Á heysti 2019 arbeiddu tey tætt saman við LookNorth í Klaksvík at menna og marknaðarføra leypin, sum LookNorth hevur framleitt í eina tíð.

Jákup Bech Jensen, sum hevur samskipað ferðina, metir, at slíkar verkætlanarferðir menna tey lesandi, og eru við til at fáa ung fólk at velja at lesa á Glasi.