Sundabátarnir, Brandur og Anru hava báðir verið á útróðri í dag. Janus Sørensen á Brandi sigur, at teir høvdu 9.000 pund í dag á 40 stampum. Ein triðingur var toskur og restin sera góð hýsa. Vit frættu eisini frá Anru, Janus Rein segði, at Anru hevði 6.000 pund í dag og at Anru eisini var á útiróðri í gjár, tá høvdu teir 6.200 pund. Hesir hava verið sunnanfyri og roynt.

Eftir steðg í nakrar dagar, helst orsakað av hørðum streymi og lágum hýsuprísi eru størru útróðrarbátarnir aftur farnir til útróðrar. Líðhamar og Norðsøki seta sunnanfyri. Sunnanfyri er eisini Klakkur, sum júst er komin undan New Foundlandi. Sum skilst so ætla teir at royna nakað afturat undir Føroyum áðrenn teir koma inn. Teir liggja sunnanfyri og bíða eftir einum maskindeili, ið skal koma frá Danmark í kvøld. Eftir tað, fara teir at troyta grunnin her.