Aksel er blivin langtíðarskaddur
Klaksvíkingur bleiv skaddur fyri nøkrum vikum síðani og nú er greitt, at hann spælir ikki komandi mánaðirnar.
20 ára gamli Aksel B. Danielsen spældi við Skála eftir summarsteðgin í fjør og gjørdi í vetur sáttmála við Skála. Men álopsleikarin verður ikki at síggja á vøllinum komandi tíðina vegna skaða.
- Eg havi verið í MR-skannara og boðini eru, at uttara liðband er rættuliga illa farið, men læknin dugur ikki at siga við vissu, um tað er heilt slitið. Meniskurin hevur eisini tikið skaða. Eg skal frætta aftur frá lækna, um tað krevur skurðviðgerð, men tað ganga helst millum tveir til fýra mánaðir, áðrenn eg kann spæla aftur, sigur Aksel B. Danielsen við Norðlýsið.
Landskappingin byrjar 8. mars. Sostatt kann Aksel missa alla fyrru hálvu av kappingini.