Um 1. apríl fara tær ymsu móttøkubingjurnar, sum nú eru í gamla grótbrotinum á Bumshamri, norður aftur á ”Bukvald” (Buchenwald) ella á Grønhólm, sum staðið hevur verið kallað.

Tó hevur býráðið 22. september 2009 samtykt, at nýggja heitið á hesum fagra staði skal vera Grønhøvdi.

Har hevur verið fríðkað um í longri tíð. Garðar við girðingum eru gjørdir og beton lagt um alt økið, so tað er lætt at halda og annars gera festir í, so bingjurnar ikki verða tiknar av vindi.

Eisini er ein manningaskúrur settur upp og øki til vandamikið burturkast gjørt. Hesum arbeiði at gera móttøkuøkið so prýðiligt og arbeiðsligt, sum gjørligt, hevur Kanjon staðið fyri.

Tá ið ruskplássið á Bumshamri er tómt fyri virksemi har, verður tað nýtt til moldgoymslu, alt fyllt upp og snøggað.

Miðjað verður eftir at kunna flyta so skjótt sum gjørligt. Men roknað verður við, at stutt eftir 1. apríl letur nýggja ruskmóttøkan hjá kommununi upp á Grønhøvda.