Uttan áskoðarar leiktu KÍ kvinnar og NSÍ kvinnurnar ein venjingardyst á Djúpumýru í gjárkvøldið. Sum skilst, so hevur kvinnufótbólturin í Klaksvík ikki verið serliga aktivur nú koronasjúkan hevur herjað.

Tað sást týðuliga at KÍ kvinnurnar mangla at blíva samanspældar. Millum annað eru fýra nýggjar frá ungdómsdeildunum fluttar upp í fremsta hópin. KÍ kvinnurnar leiktu fýra venjingardystir áðrenn korona og í gjárkvøldið var fyrsti dysturin síðani tað. Næsti venjingardysturin skal leikast í Runvík í komandi viku. 

Kappingin byrjar annars 24. mai, tá vit fáa ein heimadyst í kvinnudeildini ímóti HB á Djúpumýru.

Um dystin í gjárkvøldið er stutt at siga, at KÍ als ikki megnaði at leggja trýst á verjuna hjá NSÍ í fyrra hálvleiki. Tað hevði við sær at hálvleiksstøðan var 3-0 til NSÍ. 

KÍ broytti liðið í seinna hálvleiki, og hetta gav úrslit. Tað gekk bara ein løta til støðan gjørdist 3-3 og endaliga úrslitið gjørdist 4-4.