Klaksvíkar Fimleikafelag - Drive in Bio
Atlantis Bio hevur verið afturlatin síðani 12. mars. Nú hevur Klaksvíkar Fimleikafelag so tikið stig til Drive in Bio á vestara havnaøki, niðanfyri goymslubygningin hjá LookNorth.
Har var at kalla útselt – eingin ”stólur” eftir. Talan var um 50 bilar, sum høvdu keypt atgongumerki á kr. 300,-, so kundu tað sita so nógv fólk í bilinum, sum hann rúmaði.
Í aftastu rekkju stóð ein yvirvaksin Scania væl polstraður og við hópin av reyðum ljósi inn – her sótu teir biláhugaðir og nýttu kvøldið við einum frálíkum filmi – 21 Bridges – ljóðið kom úr bilradionum.
Filmfelagið var væl riggað til við vaktum og eisini eini rullandi kiosk, sum koyrdi millum bilarnar og bjóðaði lystimeti til sølu. Sodavatn, chips, bomm og kaffi.
Jú, hatta riggaði bara heilt væl og fólk vóru nøgt, eins og veðrið var av tí besta.