KÍ gav AB bank á Argjum
Tað var klassamunur frá byrjan til enda, tá KÍ vann 6-0 móti AB.
KÍ manglaði frá byrjan nakrar av teimum, ið vanliga roknast sum lyklaleikarar. Tá verður serliga hugsað um Jákup B. Andreasen og Jóannes Bjartalíð. Tann seinni kom inn í hálvleikinum og í seinna hálvleiki kom eisini næstmest skorandi KÍ-leikarin í søguni, Páll A. Klettskarð, á vøllin. Eisini AB manglaði nakrar leikarar harímillum Jesper Van Der Heyden og Adeshina Lawal.
KÍ vann 6-0 í einum dysti, har KÍ vassaði í málmøguleikum, meðan Kristian Joensen heilt móti endanum mátti stórbjarga fyri at AB ikki slapp á máltalvuna. 6-0 var helst sigandi fyri dystin, tí KÍ hevði eisini nógvar stórar málmøguleikar afturat málunum í dystinum.
Málskjúttar hjá KÍ vóru Ole Erik Midtskogen (2), Boris Dosljak, Jóannes Bjartalíð, Ísak Simonsen, og tað síðsta var sjálvmál.
KÍ kom við sigrinum uppá 3. plássið í deildini og hevur vunnið fýra sigrar á rað. Allir móti botn 5 liðum. Sunnudagin á Norðoyastevnu vitjar NSÍ, sum liggur á 2. plássi, í Klaksvík.