Hyggja vit eitt sindur víðari, so sæst eisini, at í P/F Conseco, ið eigur Amplexa A/S, er beiggi Johan Dahl, Hans Atli Dahl, stjóri, og millum nevndarlimirnar finna vit navnið Pál Magni Weihe. Um navnið ljóðar kent, so er tað ikki løgið: Talan er um ráðgevandi yvirlæknan Pál Weihe.

Sostatt er yvirlæknin og arbeiðsmedisinarin, ið hevur mælt Landsstýrinum til at kanna øll, ið koma til landið, nevndarlimur í fyritøkuni, ið eigur aðra av fyritøkunum báðum, ið hava fingið uppgávuna frá sama Landsstýri, í fyrstu atløgu við 4 milliónum krónum úr Landskassanum tvær tær fyrstu vikurnar. Eftir ætlan skulu fyritøkurnar kunna krevja 390 krónur frá hvørjum ferðandi frá 10. juli at rokna.

Fyritøkan Amplexa hevur við øðrum orðum bæði ein nevndarlim í móðurfyritøkuni Conseco, sum ráðgevur Landsstýrinum, og ein nevndarformann sitandi í Løgtinginum, ið blástemplar tær avgerðirnar, sum nevndarlimurin hjá fyritøkuni, ið eigur Amplexa, hevur tilmælt. Og Thetis hevur sum kunnugt ein lógarsmið afturat í síni nevnd.

Uttan iva kemur tað sera væl við hjá hesum fyritøkunum, at Landsstýrið hevur avgjørt, at øll skulu kannast, fyrst við landskassastuðuli og síðani fyri egna rokning.