Í gjárkvøldið fekk Kamilla G. Sørensen í Klaksvík, sendandi boð í Messenger frá norskari gentu, sum hevði funnið fløskupostin, sum Kamilla hevði kasta í Kalsoyarfjørð á Sjómannadegnum 19. August 2011. Tað vóru tvær 18 ára gamlar vinkonur, sum eru strondruddarar og ofta rudda framvið strondini, ið funnu fløskupostin í Hortavær í Norra.

Hetta skrivar Kirsti Sæternes til Kamillu:
- Hei! Vi heiter Kirsti Sæternes og Eva Lohrengel, og vi er atten år. Flaskeposten blei funne då vi strandrydda i Hortavær, Leka, Norge.

Kamilla heldur tað er stuttligt at fløskuposturin nú er afturfunnin, tí hon hevði næstan gloymt, at hon kastaði hann, sum 11-ára gomul í 2011. 

Á myndunum niðanfyri sást brævið, sum lá í fløskupostinum, genturnar sum funnu fløskupostin og hvar hann bleiv funnin.