Íleggjarar trúgva uppá Niklas
Niklas Nikolajsen úr Føroyum hevur fingið eina kapitalinnspræning uppá 311 milliónir krónur til sína fyritøku, Bitcoin-Suisse, frá íleggjarum. Við hesum kemur marknaðarvirðið á fyritøkuni upp á 2,1 milliardir. Niklas er klaksvíkingur og av Kjølbro-ættini.
Fyritøkan hevur seinastu árini havt eitt yvirskot uppá 347 milliónir, og sambært Finans upplýsir felagið, at sera stór menning er hend fyrra hálvár í 2020. Niklas sigur, at hendan kapitalinnspræningin váttar, at íleggjarar og marknaðurin hava ”validerað” hansara fyritøku, hvat royndum, atdráttarmegi, strategi og forrætningsætlan viðvíkir, og tað er her, at styrkin hjá fyritøkuni liggur. Innspræningin er ein varði í søguni hjá Bitcoin Suisse.
Í 2011 keypti Niklas bitcoins fyri minni enn 50 cent (amerikonsk cent) stykkið. Hetta var ein sera góð forrætning, tí kursurin streyk upp til 15.000-20.000 amerikanskar dollarar, og tað gjørdi Niklas til millióning. Enntá ”mangemillionær”, sum danir siga. Tvey ár eftir íløguna stovnaði hann so Bitcoin Suisse, sum hann er formaður í í dag.
Fyritøkan hjá Niklasi tekur sær av at hjálpa fólki at gera íløgur í kryptovaluta. Niklas sigur við miðlarnar, at umsetningurin er í milliardaklassanum.