Fyrrapartin vórðu umrøddar privatiseringar av almennum partafeløgum, og orðaskiftið kom rættiliga skjótt inn á Føroya Tele. Her var Johan Dahl ikki heilt álvuligur, og samanbar telesamskifti við flogferðslu, tá tað kom til týdningin av tí sum undirstøðukervi. Hinvegin segði hann seg ongar trupulleikar hava av tí, um landið seldi sín part av Smyril Line, og hann var eisini positivur fyri møguleikanum at selja Bank Nordik.

Johan Dahl slapp heldur ikki undan skotum um hansara leiklut í Huawei. Bjarni Hammer helt speiskliga fyri, at tað at Huawei var vrakað sum veitari til 5G hevði sítt at siga fyri, at samgongan nú ynskir at privatisera Føroya Tele. Eisini bleiv sagt, at endamálið bert var at minka um undirskotið, sum sambært øllum sólarmerkjum fer at vera á fíggjarlógini í heyst. Eftir øllum at døma var Javnaðarflokkurin ikki fyri eini privatisering av almennu telefyritøkuni.

Høgni Hoydal, tingmaður og formaður fyri Tjóðveldi, nevndi, at samgongan hevði ætlanir um at privatisera SEV, men hetta var Magnus Rasmussen, tingmaður fyri Sambandsflokkin, skjótur at avsanna. Talan fór ikki at vera um at privatisera elfelagið. Ein kann siga, at Magnus Rasmussen í dag hevði leiklutin at verja løgmann og samgonguna ímóti skotum frá andstøðuni, í øllum førum tá tað kom til ætlanirnar um at skilja netpartin frá restini av SEV.

Sum heild var aðalorðaskiftið í dag ikki so lívligt sum í gjár. Sum skilst á fleiri portalum, so hava fleiri tingfólk í staðin lagt lesarabrøv út, summi teirra við støði í tí, tey førdu fram á tingsins røðarapalli í gjár. Sum nevnt fyltu privatiseringar og at skilja netið frá SEV heilt nógv í dagsins aðalorðaskifti, men eisini varð komið inn á bústaðarpolitikkin hjá landsstýrinum og serstakliga leiklutin hjá Bústøðum í hesum sambandi.

Samferðslan millum oyggjarnar, serliga sjóvegis, fekk eisini rúmd í aðalorðaskiftinum. Ikki øll eru álvulig við tað, sum landsstýrið hevur róð fram undir um at útveita ávísar oyggjaleiðir. Mykinesfarleiðin er nevnd sum ein fyrimynd, men eitt nú hevur Útoyggjafelagið gjørt vart við, at tey stúra fyri, hvat hendir, um varslaðu útveitingarnar av Fugloyar- og Svínoyarfarleiðini og Kallsoyarfarleiðini verða til nakað. Orðaskiftið um samferðsluna var annars einamest av yvirskipaðum slagi og ikki so ítøkiligt.

Komið varð inn á tað, sum løgmaður segði um gongd í haga. Hetta málið vísti seg at gerast eitt tað mest kontroversiella av teimum, ið vóru til viðgerðar, ikki minst úti í almenninginum. Har hava bøndur víst sína ónøgd, meðan Hagafelagið stuðlar uppskotinum. Og í samgonguni tók samgonguflokkurin Fólkaflokkurin kaldliga ímóti tí, serliga Jørgen Niclasen og Brandur Sandoy, meðan Framsókn, serliga forkvinnan Ruth Vang, tók væl ímóti tí.

Tingfólk megnaðu sum heild væl at halda seg til evnið í dag, burtursæð frá einstøkum ”stikkpillarum” millum samgongu og andstøðu. Men samanumtikið vóru løgtingslimirnir siðiligir, lurtaðu eftir hvørjum øðrum og tóku til sín. Nakað sum bendi á, at teir høvdu brúkt tað mesta av partapolitiska krútinum í gjár.