Føroyar fylla ov nógv á donsku fíggjarlógini
Blokkurin stendur í stað fjórða árið á rað, og annars fáa Føroyar sera nógva umrøðu, nú danska fíggjarlógin er til viðgerðar. Ríkisumboðið fær meira pengar at arbeiða við, 8,6 milliónir í ár í mun til 6,9 milliónir í fjør. Ein orsøk til hetta er, at tað verður ríkisumboðið, ið skal umsita CPR-numrini til føroyingar, umframt at ríkisumboðið skal viðgera umsóknir um NemID og seinni MitID og umsita hetta framyvir.
Møguliga spælir tað inn, møguliga ikki, at hvørki Tjóðveldi ella Fólkaflokkurin, Radikalt Sjálvstýri, situr á Fólkatingi longur. Men í øllum førum fylla Føroyar sera nógv í uppskotinum til danska fíggjarlóg fyri 2021. Í tíðindunum fyrr í dag kom fram, at ”Færøerne” eru nevndar 160 ferðir í donsku fíggjarlógini, og orðið ”færøsk” 34 ferðir.
Upphæddin ljóðar kanska ikki av tí nógva, men Danmark er biðið um at garantera limagjaldið til FAO, ið er 15.000 krónur um árið. Ein heil millión er tó sett av, tí at hugsast kann, at aðrir limafelagsskapir fara at krevja tað sama, og tí at upphæddin eisini fevnir um Grønland. Og Danmarks Innovationsfond fær avsett 1,7 millión til føroyskar og grønlendskar vinnu-Ph.D.-verkætlanir.
Heildarveitingin, ríkisveitingin ella blokkstuðulin verður sum undanfarin ár 641,8 milliónir, og 8,9 milliónir koma afturat í sonevndu “bonuspuljuni”. Universitetið í Keypmannahavn fær 1,5 milliónir um árið til gransking í føroyskum viðurskiftum, eins og ½ millión er avsett til grønlendskt og føroyskt talgilt undirvísingartilfar. Og tríggjar virðislønir fara at verða latnar til høvuðsritgerðir, eina í hvørjum landi í ríkisfelagsskapinum, til lesandi, ið skriva høvuðsritgerð ella spesiali um ríkisfelagsskapin. Her verður tað tó bert ein einstøk høvuðsritgerð í hvørjum av teimum trimum londunum, ið kann vinna.
Umframt alt hetta fær forsætisráðharrin heimild til at gjalda Føroya Landsstýri helmingin av teimum pengunum, sum koma inn í sektum fyri ólógliga fiskivinnu og konfiskatiónir í føroyskum øki.
Fyri ein loysingarsinnaðan eru hesar upphæddirnar púra burturvið!
Um tað er tí at Sambandsflokkurin og Javnaðarflokkurin nú hava tey bæði fólkatingsumboðini hjá Føroyum í Danmark, skal vera ósagt, men hetta reisir onkur ivamál. Til dømis, hví skal Danmark kautionera fyri føroysku limagjøldini í millumtjóðafelagsskapum? Hví skal ríkisumboðið umsita CPR-nummur og NemID fyri Føroyar? Og hví er tað Danmark, ið skal gjalda fyri gransking og gera undirvísingartilfar? Hetta eru alt uppgávur, sum vit í Føroyum væl megna.
Samanumtikið má sigast, at loysingarmálið er steindeytt í politisku skipanini. Tjóðveldi stýrdi seg í andstøðu við rikna politikkinum seinasta valskeið og teir radikalu sjálvstýrararnir settu fiskivinnumálið hægri enn loysingarmálið, tá teir valdu samgongufelagarnar á løgtingsvalinum fyri einum ári síðani.