Tað er ikki vanligt at dystir blíva fluttir so seint undan at teir skulu spælast. Fyri stuttari tíð síðani bleiv dysturin fluttur frá hósdegi til fríggjadag vegna U21-landsdyst týsdag.

Formaðurin í kappingarnevndini hjá FSF, Róin Schrøter, sigur, at tað er ein politikkur, at tað skulu vera fýra dagar millum dystir, tá altjóða dystir eru uppií.

- Í hesum føri liggur ein U21-landsdystur týsdag. Tað ger, at komandi landskappingardystir ikki kunnu vera fyrr enn leygardag fyri at liðini fáa neyðugu hvíldina. Tí politikkurin er, at tað skulu vera minst fýra dagar millum dystir, tá altjóða dystir sum landsdystir ella Europa dystir eru á skrá. Liðini fingu kunning um hetta áðrenn vikuskiftið. Í heimligu kappingini royna vit eisini at hava fýra dagar millum, men tað kann koma fyri, at vegna tíðartrýst eru tríggir dagar millum. Tað er tað í tveimum førum í kappingini í ár seint í kappingini, tá liðini eru í góðari venjing, sigur Róin Schrøter.

Ein spurningur sum fleiri seta sær er hví dystirnir millum KÍ-HB og NSÍ-B36 fyrst fyri stuttari tíð síðani blivu lagdir fríggjadag, tá øll vóru vitandi um U21-landsdystin týsdag, men so eina viku áðrenn aftur bleiv fluttur ein dag til leygardag.

- Tá dystirnir lógu fríggjadag hevur man ikki tikið hædd fyri fýra døgum í hvíli tíð frá altjóða dystum, men tað hava vit rætta nú, sigur Róin Schrøter við Norðlýsið.