Nú KÍ stendur frammanfyri tí helst størstu avbjóðingini hjá felagnum nakrantíð, fekk Norðlýsið orðið á Tummas Lervig, formann í KÍ, og spurdu hann, hvussu hann hevði tað við hesi avbjóðingini. “Eg eri spentur”, var tað fyrsta, hann segði, og legði so afturat, at hann var takksamur fyri at vera komin so langt. Tað er ikki komið av ongum, og hevur kravt nógv – eisini avgerðir, sum hava verið rakt bæði stuðlar og felagsskapin hart. Men tær hava verið neyðugar, leggur formaðurin eina við.

Tá KÍ mátti ta tungu leið niður í 1. deild at venda í 2010, bleiv avgjørt, at tað skuldi byggjast upp á felagið fyri hvørt ár. Og tað er tað, vit hava gjørt, sigur Tummas Lervig. Fyrsta stigið var sjálvandi uppflytingin, og síðani hevur tað gingið framá við onkrum smávegis afturstevi, men í tí stóra og heila er tað tann avgerðin, ið ger, at KÍ stendur við hesi ótrúliga spennandi uppgávuni í dag.

Góðar vónir

Um dystin hóskvøldið sigur formaðurin, at Corona hevur órógvað serstakliga nógv. Krøvini gerast bara strangari og strangari, og tá KÍ-hópurin fer til Írlands, so koma tey at búgva í tveimum “boblum”. Hópurin sjálvur skal búgva í eini boblu og restin av fólkunum rundan um liðið í eini aðrari, og har fer ongin kontakt at vera ímillum, sigur Tummas Lervig.

Venjarin stóran leiklut

Formaðurin letur væl at venjaranum hjá KÍ, Mikkjali Thomassen, og sigur, at ofta er tað best bara at lata hann fáa frið at taka sínar egnu avgerðir, tí tað dugir hann væl. Mikkjal er ótrúliga væl fyrireikaður og tekur uppgávuna ótrúliga seriøst. Tað sum teir hóast alt hava tosað saman um, er at fáa dystirnar í heimligu kappingini útsettar, so teir ikki órógva, og hetta er eydnast.

Stóri spurningurin er, at tá nú KÍ hevur bygt upp eftir seinastu 10 árini, og hevur rokkið alsamt størri tindum, tann fyrsti stóri var steypasigurin í 2016, ein tann enn størri var føroyameistaraheitið í 2019, og í ár playoffs í Europa League, so svarar formaðurin, at hetta longu er tað størsta, sum higartil er rokkið, og at hann trýr uppá, at tað letur seg gera at røkka bólkaspælinum í Europa League.

Týdningarmikil stuðul heimanifrá

Tummas Lervig sigur, at á “heimafrontinum” hevur hann fingið nógvan stuðul, hóast KÍ fyllir sera nógv. Baklandið bakkar hann hundrað prosent upp, og tað hevur nógv at siga.

KÍ ein lívsstílur

KÍ er ikki bara eitt frítíðarítriv, tað er ein lívsstílur, og tað er umráðandi at finna sínar sterku síður og hvat ein sjálvur er góður til. Harnæst kemur tað at duga at finna fram til røttu samansetingina av fólki í nevndini við at finna fram til, hvat tey fólkini eru góð til og brúka teir eginleikarnar. Í núverandi løtu riggar tað væl, endar formaðurin við at siga.

Norðlýsið takkar Tummasi Lervig fyri samrøðuna og ynskir honum og felagnum góða eydnu við at røkka tí størsta málinum nakrantíð i kvøld.