Kringvarpið dugir ikki Føroyakortið
Tað var eitt sindur pínligt at vera vitni til kommunuvaldekningin av Kunoyar Kommunu hóskvøldið 15. oktober. Ikki tí, innslagið var áhugavert, samrøðurnar við fólk í Kunoynni vóru forkunnugar og upplýsandi – og grafikkurin og tølini søgdu greitt, at tað ikki stendur illa til í Kunoy. Tað er sjálvsagt góð tíðindi. So langt, so gott.
Men aftanfyri John Johannesen, ið annars sjálvur hevur røtur í Norðoyggjum, dagaði eitt Føroyakort, og sum vanligt er, var kommunan, ið innslagið er um, markað við grønum liti. Omanfyri stóð við sama liti sum markaða oyggin, “Kunoyar Kommuna”.
Tað var bara ikki Kunoyar Kommuna, ið var markað við grønum, men Kalsoyggin – ið er partur av Klaksvíkar Kommunu.
Hinvegin skal sigast til Kringvarpsins lutvísa rós, at Heini Gaard, sjónvarpsmaður, var so farin í rætta oyggj. Søgan sigur tó onki um, hvørt hann fyrst hevur verið í Kalsoynni og har hevur fingið at vita, at hann er komin skeivt.