Sven Dahl er 52 ára gamal og eigur fýra børn og fýra abbabørn. Hann er útbúgvin bilmekanikari og er sjálvstøðugur vinnurekandi. Eisini hevur hann sitið 12 ár í skúlastýrinum fyri Klaksvíkar kommunu, og sum tann einasta skúlastýrislimurin, ið hevur sitið í skúlastýrinum í skúlanum við Ósánna, Ziskatrøð og á Skúlatrøð.

Harafturat hevur Sven eisini sitið í bæði Norðoya Sjálvstýrisfelag og Landsfelagðinum hjá Sjálvstýri.

Sjálvur sigur Sven Dahl soleiðis:

Nøkur av málum, sum eg vil arbeiða við, um eg verði valdur inn eru, at 2. og 3. byggistig av skúlanum á Skúlatrøð skulu fara í gongd sum skjótast.

Havna- og vinnuøkið skal raðfestast høgt, so allar fyritøkur í Klaksvíkar kommunu - bæði lítlar og stórar - kunnu ogna sær vinnustykkir, so tær kunnu mennast og vaksa.

Fjølbroyttar bústaðar møguleikar, so øll kunnu seta búgv í Klaksvíkar kommunu, bæði ung og eldri.

Umráðandi er eisini, at arbeiði av bygningum og vegum, sum er í gongd verður gjørt liðugt skjótast til ber.

Eisini brenni eg fyri, at eldarøkið framahaldandi verður betri, so tey eldru í kommununi fáa bestu umstøður.