Vit hava til stuttleika gjøgnumgingið innsløgini í Degi og Viku higartil hesa vikuna og fingið staðfest, at mest sum øll innsløg snúgva seg um og verða gjørd í einum og sama staði í landinum: Tórshavn.

Til dømis hevur eitt innslag verið úr Klaksvík hesa vikuna í Degi og Viku, og tað vardi í max. 30 sekund og snúði seg um, at covid-19 testirnar nú eru fluttar oman á Vestara Havnarlag. Innslagið var at meta mest sum ífylla.

Hoydalar og skoytubreyt úr alskins sjónarhornum

Tað verður sagt innan matgerð, at tú kanst matgera somu ráðvøru upp á alskins mátar, og hetta kann av sonnum sigast um tíðindaflutningin hjá KvF um ymisk lokal mál í Havnini.

Til dømis hava Hoydalar verið lýstar í mest sum øllum sendingum hjá tjóðarrásini seinastu dagarnar: í tíðindum í ÚF, í Breddanu, í Nón, í Degi og viku fleiri ferðir, hóast talan er um eitt lokalt mál í Havnini, sum ikki hevur relevans fyri allar landsins borgarar.

Sama kann sigasta um skoytubreytina, sum nú er blivin flutt nakrar ferðir í Havnini. Hetta hava alskins sendingar í KvF tikið upp, snara og vent fleiri ferðir saman við eini standmynd av Nólsoyar Páll – alt í sama lokaløki, Havnini.