Veðrið í kvøld
Í morgun hava verið 5 til 10 m/s av vesturhallum norði og ælaveður. Hetta hevur verið veðrið í tveir dagar, og soleiðis fer tað at vera í kvøld eisini.
Luftin kemur av innlandsísinum í Norðurgrønlandi. Har er ógvuliga kalt, men luftin ornar á vegnum til okkara, meðan hon tekur damp í seg upp í havinum. Tí er skýggjað og ælaveður her hjá okkum, og hitalagið er um 3 stig – t.e. á markinum fyri kavaavfall ella regnavfall.
Tað er nokkso ymiskt at síggja við mátistøðirnar hjá Landsverki, hvussu langt ella stutt tað er ímillum ælini. Orsøkin er ættin, hvussu ymiskur vesturhallur norðan er kring landið.
Í kvøld, tá ið fólk fara at skjóta fýrverk, skulu vit vænta sama veður, sum er í morgun og var í allan gjár, og tað eru 5 til 10 m/s av vesturhallum norði, skýggjað og ælaveður, og hitin fer at liggja um 2 til 3 stig.
Hetta er ársins síðsta veðurforsøgn, og her av veðurredaksjónini hjá Norðlýsinum verður tí ynskt øllum okkara lesarum eitt gott nýggjár við tøkk fyri viðmerkingar, spurningar, góð ráð og myndir í 2020.