Veðrið í vikuni
Tað fer at vera kalt í veðrinum í tveir dagar afturat. Týskvøldið fer at venda. Tá fer nakað væl lýggjari luft at reka ímóti Føroyum. Hitin fer at kvinka seg uppeftir umleið 1 stig hvønn dagin.
Ættin fer at liggja imillum landsynning og sunnan til leygardagin. Tá fer hann upp í vestan; sunnudagin fer aftur at kølna.
Men í morgin – mánadagin – fer hann framvegis at koma av útnyrðingi ella norði. Vindferðin fer at liggja um 10 til 15 m/s, men hann minkar út á kvøldið. Skýggjað allan dagin við kavaælingum. Hitin fer at liggja úr frostmarkinum og upp í 4 stig.
Týsdagin liggur hann av norði til einaferð seint um kvøldið. Tá fer hann at mala úr ymsum ættum. Vindferðin fer at minka úr 5 til 10 m/s um náttina niður um 3 m/s um kvøldið. Fyri tað mesta skýggjað og ælaveður við kava, men út á dagin turt. Hitin týsdagin fer at liggja um 2 til 4 stig.
Mikudagin landsynningur, 5 til 10 m/s. Skýggjað og turt fyri tað mesta. Hitin fer at liggja um 3 til 5 stig.
Hósdagin landsynningur, 5 til 10 m/s. Skýggjað og ælaveður við vátakava. Hitin fer at liggja um 4 til 6 stig.
Fríggjadagin sunnan, 2 til 5 m/s; um kvøldið veksur vindurin upp í 5 til 10 m/s. Sólglottar og turt. Hitin fer at liggja um 5 til 7 stig.
Leygardagin sunnan og seinni útsynningur. Vindurin fer at minka úr 5 til 10 m/s niður um 5 m/s út á fyrrapartin. Eitt brúgvalag við regni seint fyrrapartin; annars turt. Hitin fer at liggja um 6 til 8 stig.
Sunnudagin útsynningur-vestan, minni enn 5 m/s, men veksandi seinnapartin upp í 5 til 10 m/s. Turt fyri tað mesta, men seint seinnapartin ella tíðliga um kvøldið fer at regna í eina løtu. Hitin sunnudagin fer at liggja um 4 til 7 stig.