Sum kunnugt hvakk stórur partur av Klaksvík við, tá ein ógvuslig spreinging var fríggjakvøldið um 01 tíðina. Orsøkin var ein gasspreinging umborð á Bláaberg, glastrevjabátinum hjá 88 ára gamla Esmari Mørkøre. Sum skilst, so hevur ein gassfløska likið inni í kahyttuni og tá so oljufýrið hevur slitið til um eitt tíðina um náttina hendi ógvusliga spreingingin.

Húsið fór omanav AWI bátinum og Esmar Mørkøre sigur, at masturin lá í einum báti sum lá við síðuna av Bláabergi. Esmar sigur víðari, at báturin er tryggjaður og skal nú út til Runavíkar til kanningar. Vit vita ikki um skrokkurin eisini hevur fingið skaða, men omandeks har bakkin er, er skaði hendur.

Hetta er "sambýlið" hjá pápa, helt ein sonur, ið var á støð, nú Bláaberg fór til kanningar. Esmar hevur brúkt alla sína frítíð á floti, tá hann var í arbeiði hjá SEV, heilt aftur í sekstiárini. Nú hann hevur verið pensioneraður, hevur hann gingið upp í bátin hvønn einasta dag at kalla. Heldur ikki hevur hann hildið seg aftur við at fara á flot tá viðraði. Nú Norðlýsið ringdi til hansara, harmaðist hann sjálvandi almikið um bátin. Eg vóni bara, segði hann, at eg fáið ein bát aftur skjótt. So sjálvt um man er 88 ára gamalur, so ber til at hava skrúvu fram um man er likamliga og sálarliga væl fyri, sum Esmar er.