Russar hava mangan verið føroyingum góðir. Besta prógvið um hetta var, tá ES í 2013, eftir áheitan frá skotum, stongdi ES-havnir fyri føroyskum skipum. Sjálvt okkara partnari í ríkisfelagsskapinum, Danmark, gjørdi tað sama, og tá vóru góð ráð dýr. Tá kom bjargingin úr eystri. Russland læt sínar havnir vera opnar fyri føroyingum, og eftir eitt ár ella so innsá ES, at havnastongsulin onki nyttaði, og tey risikeraðu at verða stevnd inn fyri WTO.

Søguliga mugu vit sjálvandi ongantíð gloyma, at Sovjettsamveldið størsti fíggindin hjá NATO, og tað situr enn hjá mongum. Men Russland og Sovjett eru ikki tað sama, hóast har framvegis eru stórar ósemjur millum Russland og NATO. Kina er nú komið upp í sum tann stóri kommunistiski aktørurin, og tað er rætt, at tað er ófrættakent, at Kina nú hevur fingið so sterk áhugamál í arktiska økinum, serliga viðvíkjandi Grønlandi.

Eisini søguliga hava vit sera góðar royndir við Russland, serliga tá tað kemur til okkara laksaútflutning og fiskaútflutning. Russarar hava verið álítandi, samstarvssinnaðir og hollir í mongum umførum. Og nú hava teir so ment eina koppseting, sum telist millum tær allarbestu. ES vil ikki keypa koppsetingar frá teimum, men tað má ES um. Ungarn er gingið ímóti ES og hevur bílagt russisku Sputnik V-koppsetingina, og teir lata væl at.

Tíðin er komin at lata gamla kaldakrígs-mótviljan fara.

Øll vita vit, at Føroyar ikki bara sleppa at liggja púra uttanveltaðar í Norðuratlantshavi. So hví ikki fáa tað besta burturúr og hava góð viðurskifti við báðar partar? Siga vit føroyingar ja til hernaðarradara, so eru vit í krithúsinum hjá Joe Biden, meðan um vit keypa Sputnik V-koppsetingar frá Russlandi, fáa vit ein fjøður í hattin frá Vladimir Putin. ES dámar hetta kanska ikki so væl, men royndirnar úr Ungarn vísa, at ES skilir tað, tí ov fáar vaccinur verða framleiddar nóg skjótt.

Sjálvandi skulu vit vera varin. At seta okkum í samband við Russland um at keypa koppsetingar tann vegin, má sjálvandi ikki gera, at Danmark tekur Pfizer-, AstraZeneca- og Moderna-variantarnar aftur. Tí er neyðugt at hava ein dialog við okkara verandi veitara um, at galdandi avtala um koppseting heldur fram. Og aftur her kunnu vit brúka hitt málið sum jarnbrot: Vísa vit vælvilja yvirfyri radaranum, so stendur danska stjórin í takksemisskuld til okkum, tí vit forðaðu fyri, at Danmark misti andlit í NATO.

Spæla Føroyar síni kort rætt í hesum báðum málunum, kunnu vit gerast fleirfaldir vinnarar, og tað enntá innanfyri mál, ið annars spjaða føroyingar.