Tað bleiv so stórt kvøld sum tað kundi vera, tá eitt lið tapir, tá Føroyar spældu á Tórsvølli í kvøld. Í fyrra hálvleiki var stóra løtan, tá VAR kolldømdi eitt mál til Danmark vegna rangstøðu. Danmark vann at enda 1-0, har sigursmálið kom eftir eitt frísparksinnlegg móti endanum av dystinum. Beint áðrenn fekk René S. Joensen sítt seinna gula kort, og tað gjørdi støðuna kanska nakað meira óskipaða enn annars, tí ein leikari manglaði í verjustøðuni. Tað var nær við rangstøðu. Í seinna hálvleiki komu Føroyar til ein stóran møguleika, ein tann størsta í dystinum, tá innkast endaði við, at Jóan Símun Edmundsson skallaði á tvørstongina.

Føroyska avrikið var framúr gott, har allir leikarar stríddust alt tað, ið teir kundu, og nakað afturat. Í málinum var Teitur M. Gestsson stórspælandi og spurningurin her, um hann her á stóra pallinum gjørdi málmansplássið til sítt framyvir. Føroysku áskoðararnir vóru sera mælskir allan dystin og fagnaðu føroysku leikarunum eftir dystin.

Eftir minni góða dystin móti Ísrael, so reisti føroyska liðið seg og var bara 10 minuttir frá einum av størstu úrslitunum í søguni.