Tilmeldingin til Kvøldskúlan er byrjað
Mangt og hvat er á skránni at ganga til í vetur, eisini fleiri nýggj og forkunnug skeið umframt tey vældámdu skeiðini, sum eru afturvendandi. Tilmeldingin lat upp fríggjadagin
Sum nakað nýtt var ein roynd í fjør gjørd at hava rørsluvenjingar fyri fólk 60+ í Badmintonhøllini, tí ikki bar til at sleppa í Ven og virka hølini í Smæruni vegna koronusmittuna. Fleiri vóru ivasom, um tað fór at rigga, men eftirfylgjandi kunnu vit siga, at tað var ein stór success. So stór, at luttakararnir vónaðu, at tað kundi halda fram. Tað hevur eydnast at gera avtalu um at kunna halda fram í Badmintonhøllini, sjálvt um tilboðið í Ven og virka eisini verður tikið uppaftur. Sostatt eru báðir møguleikarnir nú í vetur.
Í vetur verður eisini arbeitt við at fáa lív í eitt manskór í Klaksvík aftur. Tað hevur ligið í dvala í uml. 30 ár. Fiona Parker hevði eitt manskór fyrst í 90-unum. Men tað steðgaði upp aftur. Nú er Fiona aftur blivin virkin í Klaksvík sum dirigentur og lærari hjá hornorkestrinum, og hon hevur játtað at hjálpa til at fáa lív í manskórið aftur, og tað eru vit sera takksom fyri og vóna, at tað fer at eydnast, tí Klaksvík eigur nógvar góðar sangkreftir, og Kvinnukórið, Suð, sum eisini virkar ígjøgnum kvøldskúlaskipanina, hevur verið ein stór sucess og hevur havt nógvar væleydnaðar konsertir, eitt nú sansakonsertir í myrkri í Spinnarínum.
Peter Kordt er ein gamal kenningur í Klaksvík. Hann var venjari hjá KÍ í 1980, 81 og 85. Peter Kordt er cand.scient.pol. (Samfelagsfrøði) og cand.phil. Harumframt hevur hann lisið
heimspeki og politiska heimspeki í nøkur ár. Hann kemur at hava eitt forvitnisligt skeið um demokrati. Hóast skeiðið fevnir um stór hugtøk, er tað hugvekjandi, lætt at skilja og skemtiligt, og eisini eggjar hann áhoyraranum at luttaka.
Eydna Skaale kemur at hava eitt spennandi skeið um retorik. Hvat er retorikkur?
Og hví hevur hetta aldargamla fakið enn týdning? Skeiðið gjøgnumgongur ymsar síður av retorikki í Føroyum. Skeiðið er lætt og ætlað øllum, sum hava áhuga fyri samfelagsviðurskiftum.
Tað hevur eisini eydnast at fáa Føroya helst kendasta heimspeking, Jógvan D. Hansen, at hava eitt skeið í Filosofi, har hann viðgerð tættir úr heimspekissøguni. Nortið verður við nakrar týðandi heimspekingar og hugsanir teirra.
Fleiri skeið hava avmarkað pláss, so tað ræður um ikki at drála ov leingi, um ein vil melda til.