Tað var eitt sindur av endurtøku av teimum síðstu dystunum á heimavølli móti teimum stóru liðunum í bólkinum.

Skotland vann 1-0 á Tórsvølli í einum sera spennandi dysti, har sigursmálið kom í síðstu løtu. Talan var um eitt sera gott føroyskt avrik móti sterka skotska liðnum og føroyingar fingu sínar møguleikar, har Ári M. Jónsson í fyrra hálvleiki fekk tann størsta í dystinum, men eins og móti Danmark og Eysturríki, so vildi bólturin ikki inn hóast møguleikarnir vóru til at skora. Skotland hevði eisini sínar møguleikar, men tað var avmarkað við stórum møguleikum.

Nú eru heimadystirnir av í hesi HM-undankappingini og staðfestast má, at tað bleiv nær við og næstan í trimum av teimum fýra dystunum móti teimum stóru í bólkinum. Tað vóru smálutir sum gjørdu, at tað kundi endað við fleiri málum og fleiri stigum til Føroyar, men tað endaði við ongum máli og ongum stigi. Hesi avrikini geva tó eina góða vón um framtíðina, tá stórar fótbóltstjóðir vitja í Føroyum.