Í einari spennandi finalu eydnaðist tað B36 at vinna løgmanssteypið og síðsta Evropaplássið.

Ikki óvæntað, so endaði tað við javnleiki, tá NSÍ-B36 møttust í finaluni um løgmanssteypið. Bæði liðini høvdu møguleikar at avgera, men tey fingu bara eitt mál í part. Í brotssparkskappingini skutu tveir NSÍ-leikarar uppum, meðan ein B36-leikari ikki fekk mál. 

Sostatt vann B36 finaluna um løgmanssteypið og eisini síðsta plássið til Conference League. NSÍ endaði fyri fyrstu ferð síðani 2014 uttanfyri Evropapláss. Tað hendi uttan at NSÍ tapti nakran dyst í steypakappingini, um vit ikki telja brotssparkskapping uppí. 

Norðlýsið ynskir B36 til lukku við løgmanssteypinum 2021.