Neyvan nakað 10-mannafar úr høvuðsstaðnum við í ár
Fleiri bátar fara møguliga at bjóða seg fram, men fleiri 10-mannafør verða ikki at síggja, ið hava róð síðstu árini.
Ormurin Langi verður ikki við
Føroyameistarin 2018, 2019 og 2020, Ormurin Langi, verður ikki við í ár. Ormurin Langi gav Klaksvíkingi harða kapping á onkrari stevnu í 2021, men tað verður ikki blái báturin, sum bjóðar av í ár. Norðlýsið hevur tosað við ein av teimum, sum hevur róð við síðstu árini, Bárður S. Guttesen.
- Tað vísti seg, at tað vóru bara tríggir eftir frá manningini í fjør, sum vóru klárir aftur. Síðani hava vit roynt at fingið manning, men tað hevur ikki eydnast og fyri viku síðani bleiv tað endaligt, at Ormurin Langi rør ikki í ár, sigur Bárður S. Guttesen.
Velja helst Ørv framum Havnarbátin
Síðstu árini hevur Havnarbáturin róð við ungari manning. Men tað er ivasamt, um hann verður við í ár. Norðlýsið hevur tosað við ein av rógvarunum, og hann sigur, at tað er ikki endaligt, men helst verður tað so, at teir fara at manna 8-mannafarið Ørv heldur. Tað er tó ikki heilt avskrivað, at rógva við 10-mannafarinum.
Sostatt bendur nógv á, at einki 10-mannafar verður við úr høvuðsstaðnum í ár. Tað er sera sjáldsamt, hóast tað er hent áður.
Í Norðlýsinum fríggjadagin viðgera við luttøkuna hjá 10-mannaførunum, har vit tosa við umboð fyri Norðing og Eysturoying um, hvussu tað gongur at manna teir bátarnar. Vit kunnu tó gleðiliga avdúka, at nógv bendur á, at tað verða avbjóðarar til Klaksvíking.