Elsebeth spyr landsstýrismannin hvussu gongur við málinum har Norðoya Bú- og Heimatænasta hevur bjóðað Klaksvíkar Sjúkrahúsi at brúka røktarheimsbygningin til ætlaðu rehabiliteringina, sum Klaksvíkar Sjúkrahús skal standa fyri.

Norðoya Bú- og Heimatænasta stendur fyri at skula byggja nýtt røktarheim til 28 búfólk, um hesi skulu flyta úr Norðoya Røktarheimi.

Er landsstýrismaðurin farin í dialog við Norðoya Bú- og Heimatænastu  um ein fíggjarleist í hesum máli?

Kaj Leo Johannesen, landsstýrismaður svarar, at NBH hevur verið á fundi við hann, um at Klaksvíkar sjúkrahús kann yvirtaka hølini hjá Norðoyar Røktaheimi ímóti gjaldi. Heilsumálaráðið hevur sent svarskriv til NBH. Landið eigur matrikkulin, sigur landsstýrismaðurin og at málið verður í løtuni viðgjørt saman við Klaksvíkar Sjúkrahúsi, sum hevur sagt seg sinnað at brúka bygningin til rehabilisering.

Einki samskifti hevur verið við NBH um fíggjarleist, sigur landsstýrismaðurin viðari, men at hann fer at taka málið upp í politisku skipanini.

Av tingsins røðarapalli segði Kaj Leo Johannesen, landsstýrismaður at hann fór heilt víst at seta sær fyri, at hetta kemur í gongd.