Norðsøki avreiddi til Fiskamarknaðin hósdagin í vikuni sum fórt 30.350 pund. Í dag landa teir aftur um 24.000 pund, báðir túrarnir eru av Føroya Banka.

Sambart Fiskamarknaðin, so seldi Norðsøki fyrra túrin fyri 343.000 krónur. Av Fiskamarknaðinum fáa vit at vita, at hetta er helst størsta veiða ein útróðrarbátur nakrantíð hevur avreitt. "Vit kunnu ikki koma til hugs nakran størri túr hjá nøkrum útróðrarbátið, tað tíð Fiskamarknaðurin hevur virkað, serstakliga er túrurin stórur í krónum fyri avreiðingina", verður sagt.

Heri Vang skipari á Norðsøka sigur í eini viðmerking, at teir avreiddu eini 20.000 pund av hýsu, restin var toskur, longa, brosma og havtaska.

Vit settu 121 stampar fyrra túrin og 120 stampar í dag, hetta gevur umleið 250 pund á stampin, fyrra túrin og 200 pund á stampinum í dag.

Vit eru júst lidnir at skipa veiðuna upp í Miðvági í dag, og koma so á Klaksvík at fáa nýggja línu umborð. Væntandi fara vit aftur á Bankan seinni í vikuni. Eg haldi at vit hava nóg nógvar dagar eftir til tað. Annars fara vit at rigga til at fara til Íslands á snelluveiðu í summar, sigur Heri Vang, skipari á Norðsøka at enda.

Seinni í ár verða 80 ár síðani at Norðsøki bleiv bygdur og sjósettur á fyrsta sinni.

Myndirnar niðanfyri eru savnsmyndir: