Magn í Klaksvík fer at hava opið alt samdøgri frá í dag av. Hetta spennandi stig ynsktu vit á Norðlýsinum at frætta nærri um og fingu eitt stutt prát við Áka Vang Poulsen, marknaðarstjóra hjá Magn.

Hann sigur at orsøkirnar eru fleiri, at Magn nú fer at hava opið 24/7, sum hann málber seg.

- Vit vilja hækka um tænastustøði hjá Norðingum, har teir nú fáa møguleikan at njóta alt tað góða, ið Magn hevur at bjóða alt samdøgri. Klaksvíkin hevur voksið seg til ein veruligan metropol á altjóða støði og vit meta at grundarlag er fyri at hava opið 24/7, sigur Áki.

Og byrjað verður í dag at hava opið alt samdøgri

- Okkara starvfólk eru sera spent at royna hetta og vit vóna at norðoyingar taka væl ímóti nýggja tiltakinum, sigur Áki Vang Poulsen við Norðlýsið at enda.