Nýggja kappróðrarneystið reist
Seinnapartin í dag varð reisigildið hildið í nýggja kappróðrarneystinum, sum í løtuni verður bygt uttast á útfyllingini í miðbýnum. Tað er byggifyritøkan Malltek, sum er høvuðsarbeiðstakari.
Arbeiðið byrjaði fyrst í árinum og í dag veittraði Merkið, saman við fløggum frá kappróðrarfelagnum, yvir nýggja prýðiliga neystinum, sum eftir ætlan skal standa liðugt seint í heyst.
Fitt av fólki var komið saman til reisigildið. Arbeiðsfólk, politikkarar og eisini nevndin í Klaksvíkar kappróðrarfelag var væl umboðað til hátíðarhaldið. Karl Johansen, borgarstjóri, segði nøkur orð og síðan varð boðið til ein døgurða í arbeiðsskúrinum.
Borgarstjórin gleddist saman við nevndini í felagnunum um umstøðurnar, sum kappróðurin í býnum nú fær. Tað fer at gera tað hugaligt hjá bæði nevnd og rógvarum í arbeiðinum fram ímóti góðum úrslitum.
Nýggja kappróðarneystið er mett at kost umleið 9. mió. krónur.